Համալիրն ունենալու է բոլոր առումներով շահավետ տեղադրություն։ Դիլիջանը երկրի բնակիչների և հյուրերի համար «մի կում թարմ օդ» է, վայր, ուր տարին բոլոր հաճելի եղանակ է, և որտեղ բնության հետ ներդաշնակության մեջ կարելի է իրապես բացահայտել Հայաստանը։
Համալիրի 3 մակարդակները տեղակայված են լինելու 1233-1300 մետր բարձրության վրա և միմյանց հետ կապվելու են ֆունիկուլյորի միջոցով, ինչը թույլ է տալու դիտահարթակից հիանալ Դիլիջանի ազգային պարկի չքնաղ տեսարանով։
Առաջին մակարդակում կլինեն հարմարավետ նախասրահներ, ազգային և համաշխարհային խոհանոցի գլուխգործոցներ մատուցող բարձրակարգ ռեստորաններ, փոքրիկ խանութներ, ուր կներկայացվեն տեղացի ֆերմերների արտադրանքը և ձեռքի աշխատանքները, մանկական ժամանցի ու կրթական կենտրոններ։ Երկրորդ մակարդակում հնարավոր կլինի համտեսել տեղական արտադրության գինիներ։ Համալիրի երրորդ մակարդակը կդառնա տարածաշրջանի մշակութային իրադարձությունների կարևոր կենտրոն, ուր կանցկացվեն երաժշտական փառատոներ, համերգներ, ցուցահանդեսներ, մասնավոր բիզնես միջոցառումներ։
«Մեր նպատակն է ստեղծել ոչ թե պարզապես կառույց, այլ «քաղաք քաղաքի մեջ», որը կդառնա «ձգողության նոր կետ» ճանապարհորդների համար և եզակի վայր տեղացիների համար։ Մենք ուզում ենք ստեղծել միջավայր, որտեղ համադրվում են ժամանցի, կրթության ու բիզնեսի բազմամշակութային զանազան ձևերը»,- ասում է Green Rock Management Group-ի ներկայացուցիչը։
Նախագիծն անկասկած կնասպտի տարածաշրջանի զարգացմանը՝ գրավելով թիրախային նոր խումբ և բարձրացնելով կյանքի որակը Դիլիջանում։
Այս բազմաֆունկցիոնալ համալիրը կապող օղակ կդառնա քաղաքի հարուստ պատմության և նրա ապագայի միջև՝ վերադարձնելով նրա նախկին հռչակն ու գրավչությունը։
